داليا

..
داليا تضحك ويحلّو الصباح
ـــــــــــــــ تشرق الشمس وتشعّ بنورها

طفلةٍ لاخالط الجدّ المزاح
... ــــــــــــــ نطّقت صمّ الصخر بحضورها

ارسلت بعيونها السحر المباح
ـــــــــــــــ للسما الزرقا وسرب طيورها

الزهر منها قطف نفسه وفاح
ـــــــــــــــ لانتهى دوره بدت في دورها

والهوى مرّ وطلب منها السماح
ـــــــــــــــ في معانقها ولمس شعورها

قالت شويّ وحمل بعضه وراح
ـــــــــــــــ من يعاندها وهذا شورها

المزون اللي تصبّ الما القراح
ـــــــــــــــ اشتهن فيها وشربن سورها

لابدا ليل العذارا ،،بارتياح
ـــــــــــــــ المكان احتلّته من فورها

فرخة الشيهان وظبيّ البراح
ـــــــــــــــ والثريا والقمر جمهورها

شامخة ماهيب مكسورة جناح
ـــــــــــــــ والعواذل كيدها بنحورها

عزّ اهلها تلبسه لبس الوشاح
ـــــــــــــــ ترجع بطيب النسب لجذورها

نور عيني يا الله ارزقها الصلاح
ـــــــــــــــ واكفها بعض العرب وشرورها
..