بيتها غربي ويفتح ورى

.
.

ياجريح الوقت ليلك سرى
والمشاعر فيه سريتها

وين ياخذك الهوس ياترى! 

(شمس ذهنك) غاب توقيتها!

الهنوف اللي غلاها جرى
مع عروقك ماتناسيتها

صحّت بجواك (طفل القرى)
والحياة اللي تمنيتها

أحرمت عينك لذيذ الكرى
ياعذابك يوم حبيتها

بيتها غربي ويفتح ورى
والهوى يطرق شجر بيتها

..

خليني بحالي

.
.

يافاتنة خليني بحالي
روحي وخلي بكره لبكره

انا تعبت اشفّر اقوالي
والفّ خيط الشكّ بالمكره

اعجابك يشوّش على ارسالي
والناس مثلك تعشق وتكره

جلّ الهموم اللي على بالي
تدور حول القاف والفكره

والاّ الغلا لامي ولعيالي
وابوي فالمنشط وفالمكره

والحرة امّ المنزل العالي
اللي لكل الحبّ محتكره

..

إلتفت يالشاعر الفانعة

.

.

قالت ام المنطق الفلسفي
إلتفت يالشاعر الفانعة

للجمال المبهر اليوسفي
وشم عطر الوردة اليانعة

قلت ياشمس الشموس اكسفي
روحي من احلامها قانعة

تتبع المكتوب ياحيسفي
وش هي من اقدارها مانعة!