الأربعاء

ابتسامة صفرا



..

عــزيــــزي المتْلوّن المتْوتَر
ــــــــــــ أنا بعد عندي ابتسامة صفرا


 
لكن بغيري ماني بــ مستهتر
ــــــــــــ اقرا الملامح كان تعرف تقرا

إسمي ليا شافه بعضهم يحتر
ــــــــــــ ادري وربي بالخوافي ادرى

أشوم عن هرج السفيه المغتر
ــــــــــــ وانته مع الخيل ( ارثعي ) ياشقرا

مير افطن لغدر الزمان المفتر
ــــــــــــ لاتامنه ترى النصيحة تشرى

اصبر ودار اللي يصيبك واستر
ــــــــــــ ماكل جرحٍ بالخياطة يبرى

هذا كلامي وانت فكّر واختر
ــــــــــــ وإكشف ميولك أو عشه بالأحرى !
..

الأحد

شاعر المليون

.

جعل شرب القهوة الصبح ماينعاد
ـــــــــــــــــــــــــ تلْفَت اعصابي وجنّني القولون

ياهجوس الشعر جيتي بلا ميعاد
ـــــــــــــــــــــــــ ليت ربعي عن سبب جيتك يدرون

كان ما خضت بغمار البحور عناد
ـــــــــــــــــــــــــ اعسف مهار القوافي على الموزون

ماضريت من البداية على المعواد
ـــــــــــــــــــــــــ قبل ماحقق هدف نفسي المضمون

اسمعوني زين ياحضرة النقاد
ـــــــــــــــــــــــــ خاتم سليمان تحت الحبر مدفون

عرش بلقيس لحرس مملكتها عاد
ـــــــــــــــــــــــــ افزعوا قبل العفاريت لايصحون

ساحة وثلة خدم يتبعون اسياد
ـــــــــــــــــــــــــ والوصية فلسفة عازف القانون

يالجان الشعر ليش العدل ماساد؟
ـــــــــــــــــــــــــ ليتني شاركت في شاعر المليون !

..

بحــ ر

..

طوّلنا والليل امسى
ـــــــــــــــــ للمركب دوّر مرسى

بحْر وما قسنا عمقه
ـــــــــــــــــ غامض وسطوحه ملسا

ساكن متْحرّك فينا
ـــــــــــــــــ صامت وشفاهه خرسا

شاركني همّ الرّحلة
ـــــــــــــــــ حنّا بغربة لاتنسى !

جاوب نغمة موّالي
ـــــــــــــــــ فـ حْبال الصوت اليـبـسا

عبّر عن حزنك بــ آآهة
ـــــــــــــــــ وقت ومن طبعه يقسى

لاتترك شي بصدرك
ـــــــــــــــــ طوّلنا والليل امسى !
..

خلّ العتب

..
لاتِعَاتِبْنِي خَلّ العَتَب
ـــــــــ مَذْهَبِك مايشْبٍه مذْهبي

هاك نسج افكاري من ذهب
ـــــــــ أشعل ابْذهْنكْ بعْضٍ احطِبي

هدّ من روعك لاترتكب
ــــــــ ذنب ماله داعي بِسْبِبي

نفعل احياناً مالا نحب
ــــــــ نتبع الواقع لو مانبي

لفترقنا قل عند العرب
ــــــــ عين ماصلت على النبي

ماخدع لكنْ شيّ انكتب
ـــــــ مَذْهّبه ماهو من مَذْهَبي

..

في دفتري

..

في دفتري صورة مره

اعطت مساحة ظهرها

للي نست تتذكره

وممر ضيق تعبره

بعد الدّرج

وهيئة لرجالٍ غريب

على الجدار ونافذة

واشيا كثير مبعثرة!
..
في دفتري طفلٍ رضيع

وبنت تاشّر من بعيد

لشايب حمل الزمن هدّ ظهره

في دفتري سهل وجبل

فوق وتحت ،، بعد وقبل

في دفتري ظلما ونور

عشب وطيور

في دفتري شمس وقمر

غيم ومطر

في دفتري دخان يتصاعد الى الاعلى

ويتشكّل ضباب

والمح وجيه اصحاب ماعادوا اصحابي!

في دفتري رقمٍ صعب

وحرفٍ على رف التعب ماينقري

في دفتري الكل حصلّ له مكان

الا( أنا ) ويش احتري ؟؟

..

ذبلت غصوني

.
ياخليّ المشاعر وش تبي ذبلت غصوني
ـــــــــــــ ادفن اللي مضى فـ ارض الوهم من ذكرياتك

جيت عقب انتهينا وانتهى الحبّ الجنوني
ـــــــــــــ رجْعِتِك منكسر عندي مثل لحظة وفاتك

ياحسافة عقب ذيك الثقة خابت ظنوني
ـــــــــــــ الوفا وين ! يا اللي دون وازع خنت ذاتك

تحت جفني قنب ذيب السهر واسمرّ لوني
ـــــــــــــ وانت غادي بك النسيان في لذة مباتك

كل دمعٍ ذرفته في غيابك من عيوني
ـــــــــــــ ماترده نهار القاك ضحكة من شفاتك

ليتني ماذكرتك يوم حسيت بطعوني
ـــــــــــــ كان ماهمّني ياناكر العشرة سواتك

قاوم الحزن كانك تقدر بحجمه تكوني
ـــــــــــــ رح عسى روْحِتِك خيره ،، قطار الحلم فاتك

كل شيءٍ يهون الا الكرامة ماتهوني
ـــــــــــــ قدمك اربع جهات و للوطا خامس جهاتك

خلني للزمن والجرح تبريه اللحوني
ـــــــــــــ انت عقب انقطع حبل الوصل حرّ بحياتك

زيّ ماعشت من دونك ليالي عش بدوني
ـــــــــــــ بس لاجيت تمشي من هنا خذ ذكرياتك


..

السبت

هلامية فكر !




(1)


هلامية فكر !
او موهبة شاعر!


طبيعي جدا و مؤمن بذاته
في عيون الاخرين


قدر يطلع على كتف المدى
وحده ويتخيّل :
طفل يركض بذاكرته
وهو خلفه
يركض ويركض


طفل يركض بذاكرته
وهو جنبه
يركض وياقف


طفل يركض بذاكرته
وهو قدمه
يركض ويسقط


طفل يركض بذاكرته
وهو كل اتجاهاته
يسقط ويركض


هلامية فكر!
او شاعر وركض اربع اطفال
انهبوا ذاكرته و،، شكراً !
..
.

(2)


هلامية فكر!


أو تجربة شاعر !


تحت جفنه قنب ذيب السهر لكن


قدر يرسم ملامح عمره الباهت


على وجه ايتمرجع بين اصابيعه


ويتْذوق طعم تجربْته المرّة


فــ كوب القهوة البااارد


وهو شااااارد !!


..



(3)


هلامية فكر !


أو فلسفة شاعر !


يناضل في سبيل ايصال


فكرة ماتهم الغير


لكن في صميمه


وده يواصل مساره للأخير( بإذن الله )


عشان بقلب (كراس الشرود) يصيغ :


مفهوم (الوجود الشاعري)


ويخون ( فلْسفْته )


..


(4)


هلامية فكر !


أو مرحلة شاعر!


مسافر في الدفاتر


تعب حمل الحروف


وملّت اقلام ومحابر


وبين اول سطر


وآخر سطر


عبث دوّن شعوره


وابتكر معنى


لمرْحلْته
..


(5)


.


هلامية فكر!


او مدرسة شاعر!


كسر شطر
و وزن شطر
ونثر حبر
ومسح سطر
و
و
مفاعيلن مفاعيلن


ممرات الكلام اضيق


من صدور الفقارا


في صباح الجوع


ياموجوع!


واقسى من ظروف المبدع


اللي قدّس المبدأ


وموت هاجس الحاجة


عشان تعيش


( مدْرسْته)


..

يافاتنة

..
يافاتنة طال الغياب وطارت اسراب الحمام
ـــــــــــــــــــــ خلّت على اغصان الغلا فـ الذاكرة ريش وهديل

أفضل طريقة للتلاقي كان تخشين الملام
ـــــــــــــــــــــ إنك من الماضي تجين وترحلين بحلم ليل

تجاوزين الخوف والربكة وحنّا في المنام
ـــــــــــــــــــــ في عالم الــ لاوعي حيث هناك واقعنا البديل

وبــ موقفٍ بيني وبينك لاحلال ولا حرام
ـــــــــــــــــــــ احضنك لين صدورنا من فرط لذّتها تسيل

الثم من شفاهك كرز وارشف تحت خدّك غمام
ـــــــــــــــــــــ أمسك يديك ونمتزج خارج نطاق المستحيل

تهب نسمة ساخنة وتمرّنا برد وسلام
ـــــــــــــــــــــ نشعل فتيل الانفس الملتاعة ونطفي فتيل

ننبت جناحين لبعض ونطير في جنح الظلام
ـــــــــــــــــــــ قلبين من نور التقوا واكيد مسراهم طويل!

..

كان الوصل حرام !

..

كان الوصل يابن الحلال حرام
ــــــــــ فانته بريء ولاعليك ملام

النور يسطع والظلام يزول
ــــــــــ والحب يبقى في القلوب دوام

مانيب في بعض الامور فقيه
ــــــــــ لكن سمعت من الفقيه كلام

يقول فكّر لاتصير بليد
ــــــــــ فالنار لايرميك فرخ حمام

من تغلبه نفسه يعيش ذليل
ــــــــــ تلقاه في الصعبة هزيل مقام

واللي على نفسه شديد عزوم
ــــــــــ يحتلّ بين الفرقدين مقام

خابرك ذيب وفي فضاك قنيب
ــــــــــ موحيه مرّة والعباد نيام

ما انته يابن مطلق قليل صلاح
ــــــــــ راجع ضميرك والسلام ختام
..

ثمة مشروع !

.
.
في راسي ثمة مشروع
ــــــــــ ببدابه حسب التشريع

مجداف ومركب وشراع
ــــــــــ ياربي ينجح مشروعي

ماني قايلك مجروح
ــــــــــ ناي ونغماتي للرررريح
يكفي من عمري ماراح
ــــــــــ هندامي يشرح / ودموعي

حلمي من مدة محبوس
ــــــــــ بيدين مرآئي قسّيس
من راسه مجرم للساس
ــــــــــ في كونه يسبح / موضوعي

حاولت اخذ بالقانون
ــــــــــ شيءٍ ما اخذته بالدٍين
لكن فرعون وهامان
ــــــــــ قالوا مايصلح / ممنوعي !

هذا واقعنا الموبوء
ــــــــــ عن شمسه نحتاج لفيء
ياراعينا داو الداء
ــــــــــ خفف لو تسمح / من روعي !

....

؟!!؟